Sáttmáli millum Fysioterapeutfelag Føroya og Fíggjarmálaráðið

 

Tímaløntir fysioterapeutar (§§ 18 - 21)

 

§ 1 Sáttmálaøki v. m.
Hesin sáttmáli fevnir um fysioterapeutar, sum starvast á stovnum hjá landinum og sjálvsognarstovnum, har Fíggjarmálaráðið hevur málsræði til at áseta lønar- og setanarviðurskiftini.

Stk. 2. Sum fysioterapeutur er at rokna tann, sum hevur løggilding sum fysioterapeutur sambært § 59 í anordning nr. 1472/2013 ígildissetan av autorisatiónslógini, við seinni broytingum.

Stk. 3. Samráðingarrættin hevur Fysioterapeutfelag Føroya, sum ger sáttmála við Fíggjarmálaráðið.
Fíggjarmálaráðið ásannar, at felagið hevur samráðingarrættin viðvíkjandi øllum fakligum
viðurskiftum hjá limunum.

Stk. 4. Ivaspurningar um at tulka sáttmálan verða at leggja fyri Fasta Gerðarætt.

Stk. 5. Sáttmálin er ikki fyri tænastumenn, tænastumenn sum fáa bíðipening og tænastumenn við
eftirløn.

Stk. 6. Tá ið starv sum fysioterapeutur er leyst, skal tað lýsast alment. Tilskilast skulu starvsstað og
starvsøki. Tó kann fyribilsstarv upp í 6 mánaðir verða sett uttan at lýst verður.

Stk. 7. Í seinasta lagi 14 dagar eftir setanina fær starvsfólkið setanarbræv. Í setanarbrævinum skal
standa:
1) navn og bústaður hjá setanarmyndugleikanum og tí setta,
2) nær setanin tekur við,
3) galdandi sáttmáli millum omanfyri nevndu partar at ganga eftir,
4) starvsheiti,
5) byrjanarløn,
6) eftirlønargjald,
7) starvsaldur og næstu broytingar í starvsaldri,
8) uppsagnartíð frá arbeiðsgevara og setta,
9) setanarbrotpartur, arbeiðstíð
10) frítíð við løn og frítíðarískoyti,
11) setanarøki og
12) arbeiðsstaður/staðir í løtuni (fatar arbeiðið um fleiri arbeiðsstaðir, skal verða viðmerkt á
hvørjum arbeiðsstaði umsøkjarin hevur høvuðsstarv).

§ 2 Løn v. m.
Starvsfólk verða lønt eftir galdandi lønartalvu fyri Fysioterapeutfelag Føroya og ganga tvey ár á
hvørjum lønarstigi.

Stk. 2. Starvsheiti og skalagongd á sáttmálaøkinum:
1) Fysioterapeutur gongur stigini 1, 3, 5, 9 og 15
2) Tann 1. oktober 2022 broytast stigini til 1, 3, 5, 9 og 17
3) Fysioterapeutur, sum undirvísir á Heilsuskúlanum, verður flokkaður á stig 19
4) Varaleiðari er á stig 28
5) Leiðandi fysioterapeutar eru á stiginum 30 og 33
6) Verður Fysioterapeutur settur í starv sum stovnsleiðari, verkætlanarleiðari ella fakligur
leiðari, verður starvið flokkað við avtalu millum samráðingarpartarnar.

Stk. 3. Fysioterapeutur, sum arbeiðir einsamallur og ikki sum leiðandi fysioterapeutur, hevur rætt til árliga viðbót kr. 12.000.

Stk. 4. Lesandi, ið hevur staðið 6. semestur, fær 85% av byrjanarløn hjá fysioterapeuti.

Stk. 5. Fysioterapeutar settir í starv við master, kandidat, phd ella professara sum førleikakrav, fáa lønar- og setanarviðurskifti samsvarandi sáttmálanum hjá AKF.

§ 3 Viðbøtur og førleikaviðbøtur
Førleikaviðbót kann latast fyri eftirútbúgving. Hesar viðbøtur eru førleikaviðbøtur og eru knýttar at starvinum. Fyri at kunna fáa førleikaviðbót, skal eftirútbúgvingin verða kravd og verða frá góðkendum útbúgvingarstað. Sjálvt um fysioterapeuturin hevur tikið meira enn eina eftirútbúgving, so verður bara ein viðbót latin. Er starvið parttíðarstarv verður viðbótin samsvarandi setanarbrøkinum.
Eftirútbúgving 120 tímar: 750,-kr.
Eftirútbúgving 160 tímar: 1.000,-kr.
Eftirútbúgving 200 tímar: 1.250,-kr.
Fysioterapeutur, sum hevur lokið prógv sum praktikkvegleiðari, fær kr. 1.250 um mánaðin í viðbót tað tíðarskeiðið, hon virkar sum praktikkvegleiðari. Er sum undantak neyðugt at nýta praktikkvegleiðara, sum ikki hevur lokið prógv, er viðbótin kr. 750 um mánaðin.
Er starvið parttíðarstarv, verður viðbótin samsvarandi setanarbrøkinum.
Hesar viðbøtur eru ikki galdandi fyri fysioterapeutar í leiðslustørvum.

§ 4 Starvsaldur
Lønin hjá fysioterapeuti verður ásett eftir, hvussu leingi viðkomandi hevur arbeitt sum
mánaðarløntur fysioterapeutur ella hevur verið í eftirútbúgving innan tey øki, sum hesin sáttmáli fevnir um.

Stk. 2. Hevur fysioterapeutur arbeitt í útlondum ella innan øki, har ið hesin sáttmáli ikki er galdandi, skal setanarmyndugleikin í samráð við felagið áseta lønarstigið. Í slíkum førum skal avgerðin takast eftir tí, sum starvsfólkið hevur arbeitt við, og teimum royndum, sum starvsfólkið hevur innan hetta sáttmálaøkið.

Stk. 3. Tá ið fysioterapeutur fer úr starvi, skal arbeiðsgevarin lata starvsfólkinum váttan fyri
starvsaldur, og starvsfólkið skal vísa hesa váttan, tá ið byrjað verður á nýggjum arbeiðsplássi.

§ 5 Lønútgjalding
Lønin verður útgoldin eina ferð um mánaðin afturút um leið 25. í hvørjum mánaði. Viðlagdur skal vera seðil, har tilskilað er, hvat lønin er fyri. Samstundis sum lønin verður útgoldin, avgreiðir stovnurin/arbeiðsplássið eftirlønargjaldið.

§ 6 Eftirlønargjald
Eftirlønargjaldið 15,8% av grundlønini verður tann 1. januar 2022 sett niður í 15%. Arbeiðsgevarin flytur eftirlønargjaldið í góðkenda eftirlønarskipan.

§ 7 Fyribilstænasta í hægri starvi
Fysioterapeutur sum fyribils røkir hægri starv í minst eina viku, eigur í hesum tíðarskeiði somu løn, sum fysioterapeuturin hevði fingið, varð viðkomandi settur í tað hægra starvið.

§ 8 Tænastubúni
Fysioterapeutur fær frían tænastubúna. Í størvum, har ið tað ikki ber til, ella har ið starvsfólk av viðgerðarávum verða biðin um at nýta síni egnu klæðir, verður latin árlig viðbót 1.920,00 kr. Er frítt vask á arbeiðsstaðnum, verður latin árlig viðbót 840,00 kr. Henda upphædd er galdandi óansæð lønarbrøk.

§ 9 Arbeiðstíð
1. Vanliga arbeiðstíðin er 40 tímar um vikuna.
Ger Fíggjarmálaráðið avtalur við onnur føroysk feløg um at seta vikutímatalið niður, verður
vikutímatalið í hesum sáttmála lækkað samsvarandi.
Dagliga arbeiðstíðin verður fastløgd millum 7 og 8½ tíma. Tó eru møguleikar at gera avtalu um frávik, krevur arbeiðsgongdin á starvsstaðnum tað. Henda avtala verður gjørd millum álitisumboðið/Fysioterapeutfelag Føroya og starvsstaðið/leiðsluna.
Arbeiðstíð út um fastløgdu dagligu arbeiðstíðina verður roknað sum yvirtíð. Matartíð, sum ásett er frammanundan, verður ikki íroknað arbeiðstíðina. Ber ikki til at leggja matartíðina fasta, verður henda roknað sum arbeiðstíð og skal tá haldast, tá ið arbeiðsgongdin loyvir tí. Henda fríløtan skal vera styttri enn ½ tíma, og fysioterapeuturin má tá vera til reiðar at møta til arbeiðis, um boð verða eftir fysioterapeutinum.

2. Kvøld- og náttarvakt.
Fyri hvørjar 40 tímar í kvøld- ella náttarvakt eigur fysioterapeuturin frí í 3 tímar. Sum kvøld- ella náttarvakt verður roknað arbeiði, sum er byrjað kl. 14 ella seinni, og sum endar seinni enn kl. 17.
Hesar reglur galda fyri allar yrka-, sunnu- og halgidagar, men ikki fyri yvirtíð og samdøgurvaktir.
Vunnin frítíð skal samsýnast við heilum arbeiðsfrídøgum, t.e. dagar, ið annars áttu at verið
arbeiðsdagar.
Henda regla umfatar ikki tímalønt, av tí at tey fáa fulla samsýning í tímaløn fyri kvøld- og
náttararbeiði.

3. Tænastuætlan.
Tænastuætlan fyri arbeiðstíð verður kunngjørd soleiðis, at fysioterapeutar altíð vita, nær
arbeiðstíðin er, og teir skulu vita 4 vikur frammanundan, nær teir hava frí. Tað er tó ikki galdandi fyri avloysarar.
Broyting í tænastulista kann bara verða gjørd í serstøkum førum (t.d. um starvsfólk eru sjúk) og í samráð við starvsfólkini.

4. Umlagdir tímar.
Verður tænastulistin broyttur (avloysarar undantiknir), skal tað verða fráboðað í minsta lagi 72 tímar frammanundan. Verður freistin ikki hildin, fær fysioterapeuturin eitt eykagjald fyri hvønn tíma. Eykagjaldið fyri umlagdar tímar er ásett í lønartalvuni.

Stk. 2. Yvirtíð.
Yvirtíðararbeiði skal, alt tað ber til, samsýnast við frítíð, sum skal vera eins long og yvirtíðin og við viðbót uppá 50% rundað uppeftir til heilar tímar. Er yvirtíðararbeiði ikki samsýnt við frítíð, tá ið triði mánaðurin er lokin frá tí, at yvirtíðararbeiðið er útint, verður løn goldin fyri yvirtíðararbeiðið eftir reglunum, sum í sáttmálanum eru galdandi viðvíkjandi yvirtíðarsamsýning, t.e. tímaløn + 50%.
Verður fysioterapeutur settur at arbeiða yvir, skal tað verða fráboðað í arbeiðstíðini dagin fyri ella fyrr. Verður ikki fráboðað rættstundis, fær fysioterapeuturin umframt yvirtíðarløn eitt varningsgjald, varir yvirtíðararbeiðið meir enn ein tíma. Varningsgjaldið er ásett í lønartalvuni.

Stk. 3. Parttíðarstarvandi.
Parttíðarstarvandi, sum arbeiða meira enn tað tímatal, sum avtalað er, og tað ikki verður roknað sum yvirtíðararbeiði, verða samsýnt í sama mun við frítíð. Hava tey ikki fingið hesa frítíð, tá ið 3 mánaðir eru farnir frá tí, at arbeiðið varð gjørt, fáa tey vanliga tímaløn. Fysioterapeutur, sum arbeiðir parttíð, hevur ikki rætt til yvirtíð, fyrr enn farið verður út um vanligu arbeiðstíðina á starvsstaðnum. Tá ið parttíðarstarvandi verður settur at gera meira arbeiði enn upprunaliga avtalað, skal hon hava boð um tað dagin fyri ella fyrr. Verður ikki fráboðað rættstundis, fær fysioterapeuturin umframt yvirtíðarløn eitt varningsgjald, varir yvirtíðararbeiðið meir enn ein tíma.
Varningsgjaldið er ásett í lønartalvuni.

Stk. 4. Frítíðarskeið
1) Arbeiðstíðin verður løgd eftir hesum reglum:
   a) Frítíðarskeiðið í vikuni skal vera minst 64 tímar út í eitt. Tó verður tað roknað sum
     givið frítíðarskeið, um frítíðin hevur verið millum 55 og 64 tímar.
   b) Tá ið viðurskiftini gera, at frítíðarskeiðið í vikuni ikki kann hava ta longd, sum ásett er
     undir a), kunnu í staðin fyri verða veitt tvey frítíðarskeið. Hesi frítíðarskeið skulu vera
     minst 35 - 40 tímar til longdar.
   c) Verða tvey ella fleiri frítíðarskeið við longd sum undir a) løgd saman, skal tað fyrsta
     lúka treytirnar undir a), og hini skulu vera í minsta lagi 48 tímar til longdar.
   d) Verður eitt frítíðarskeið við longd sum undir a) lagt saman við frítíðarskeiði sum undir      b), skal tað fyrsta frítíðarskeiðið lúka krøvini undir a), og hini skulu vera í minsta lagi 24       tímar til longdar.
   e) Verða tvey ella fleiri frítíðarskeið við longd sum undir b) samanløgd, skulu tvey tey           fyrstu tilsamans hava longd sum nevnt undir a), og hini skulu vera í minsta lagi 24             tímar til longdar.
2) Verður neyðugt at broyta frítíðina, sum hoyrir til vikufrítíðarskeiðið ella annað frítíðarskeið, sumer 24 tímar ella meira til longdar, hjá fulltíðarstarvssettum og parttíðarstarvssettum verður arbeiðstíðin samsýnt eftir yvirtíðarreglum, sambært stk. 2, tó fyri minst 6 tímar.
3) Verður eitt frítíðarskeið av serligum orsøkum tikið aftur, verður so skjótt sum til ber sum
samsýning givið annað frítíðarskeið og eitt ískoyti í tíð svarandi til 50% av tí arbeiði, sum gjørt var hetta frísamdøgur, rundað upp til heilar tímar. Samlaða endurgjaldið verður tó í minsta lagi fyri 6 yvirtímar ella 9 tímar til frígongu.

Stk. 5. Frídagar
1) Sum fastir frídagar eru at rokna: Nýggjársaftan, nýggjársdagur, skírisdagur, langi fríggjadagur, páskaaftan, 2. páskadagur, flaggdagur, dýri biðidagur, Kristi himmalsferðardagur, hvítusunnuaftan, 2. hvítusunnudagur, ólavsøkudagur, jólaaftan, 1. jóladagur, 2. jóladagur.
Sum hálvir frídagar eru at rokna: Grundlógardagur eftir kl. 12, ólavsøkuaftan eftir kl. 12.
Fysioterapeutar hava rætt til frí teir hálvu ella føstu frídagarnar, ella rætt til endurgjald svarandi til frí á annan hátt. Frí verður givið á annan hátt í hesum førum:
   a) Vanligt arbeiði fastar ella hálvar frídagar.
   b) Tá ið vikufrísamdøgrið ella onnur frítíð, sambært stk. 4, nr. 2 fellur fastar ella hálvar         frídagar.

Men ikki í hesum førum:

  1. Tá ið fastur ella hálvur frídagur fellur vikudag, sum fysioterapeuturin altíð hevur frí.
  2. Parttíðarstarvandi, sum hava fasta arbeiðstíð, og dagurin fellur ein dag, tey kortini hava vikufrítíðarskeið.

2) Frítíðin skal vera sum ásett undir stk. 4, nr. 1, b) ella e). Er henda frítíð ikki givin, tá ið 3.
mánaðurin er lokin frá tí, at arbeitt varð fastan frídag, verður endurgjald veitt í peningi sambært reglunum í stk. 2 um yvirtíð, tó í minsta lagi fyri 6 tíma arbeiði.

Stk. 6. Yvirtíð uttan vakt. (Uppkall).
Tey, sum verða sett til arbeiðis uttan fyri vanligu arbeiðstíðina, fáa løn sum fyri yvirtíð sambært stk. 2, nr. 1, tó í minsta lagi fyri 3 tímar. Fyri arbeiði meira enn 3 tímar verður goldið yvirtíð fyri hvønn byrjaðan tíma. Verður fysioterapeutur biðin til arbeiðis fleiri ferðir innan fyri 3 tímar, fær hann tó bara løn fyri 3 yvirtímar. Fyri arbeiði út um 3 tímar, verður yvirtíðargjald latið fyri hvønn byrjaðan tíma. Verður fysioterapeutur biðin til arbeiðis í tíðarskeiði sambært stk. 4, verður lønt eftir hesum reglum: Fleiri uppkall innan fyri 6 tímar frá 1. uppkalli at rokna, verða roknað undir somu tíð.
Verður næsta uppkall meira enn 6 tímar aftaná 1. uppkall, verður samsýningin sambært fyrra stk.

Stk. 7. Samsýning fyri sunnudagar og fastar frídagar.
Fyri sunnudagsarbeiði og arbeiði teir hálvu og føstu frídagarnar, sum ikki eru sunnudagar, verður latin eyka samsýning 50% fyri hvønn tíma, arbeitt er. Arbeiði teir føstu frídagarnar, sum nevndir eru í stk. 5, verður samsýnt við 50% eyka av teirri arbeiðstíð, sum arbeitt er fastan frídag. Er endurgjaldsfrítíð ikki givin, tá ið 3. mánaðurin er lokin frá tí, at arbeitt varð sunnudag, hálvan ella fastan frídag, verður latið endurgjald svarandi til 50% av tímalønini í dagtænastu sambært §18. Starvsstaðið og álitisfólkið/Fysioterapeutfelag Føroya kunnu tó gera avtalu um, at samsýningin verður veitt fyrr enn annars, um ikki ber til at fríganga. Samsýning verður veitt fyri hálvar tímar.
Nevnda samsýning verður eisini givin fyri yvirtímar sambært stk. 2, um arbeitt verður nevndu dagar.

Stk. 8. Ótíðargjøld (stk. 8, 9 og 10).
Fyri arbeiði leygardag millum kl. 12.00 og 24.00 og mánadag frá 00.00 til náttarvaktin endar, verður fyri hvønn tíma goldin eykasamsýning sambært talvu við ótíðargjøldum v.m. Samsýningin verður eisini latin fyri yvirtíðartímar sambært stk. 2 sum falla innan fyri nevndu tíðarbil. Viðbótin verður roknað í heilum tímum.

Stk. 9. Fysioterapeutar, sum arbeiða í kvøld- og náttarvakt, fáa eykasamsýning fyri hvønn tíma sambært talvu við ótíðargjøldum v.m. Henda upphæddin verður eisini latin fyri yvirtíðartímar sambært stk. 2.

Stk. 10. Verður arbeitt 2 tímar ella meira út um vanliga arbeiðstíð, hevur fysioterapeutur rætt til ½ tíma matarsteðg uttan lønarmiss.

§ 10 Broyting í arbeiðsgongd v.m.
Tá ið avgerandi broytingar verða gjørdar í arbeiðsgongdini, ella nýggj tøkni verður tikin í nýtslu, skal starvsfólkið fáa boð um tað í góðari tíð fyri at fáa høvi til at vera við í tilrættisleggingini.
Krevja slík tiltøk eftirútbúgving, skal starvsfólkið hava høvi til at fáa ta neyðugu eftirútbúgvingina, so tey kunnu røkja hetta arbeiði.

§ 11 Sjúka
Fysioterapeutar fáa løn undir sjúku sambært løgtingslóg nr. 13 frá 1. juli 1958 um starvsmenn.

Stk. 2. Um starvsfólk sjúkrameldar seg á frígongudegi, skal dagurin roknast sum frígingin. Um starvsfólk sjúkrameldar seg, áðrenn frígongudagurin er byrjaður, verður tíðin at rokna sum sjúkradagur.

Stk. 3. Verður barn hjá fysioterapeuti sjúkt, hevur starvsfólkið í samband við sjúkuna rætt til frí við løn - tó ikki í meira enn 2 dagar í senn og í mesta lagi 10 dagar árliga. Hava tey meira enn 2 børn undir 10 ár kunnu tey fáa frí í 20 dagar.

§ 12 Frítíð
Fysioterapeutar fáa frítíð og frítíðarløn sambært løgtingslóg nr. 30 frá 1. apríl 1986 um frítíð við løn við seinni broytingum.

Stk. 2. Starvsfólk eiga rætt til serstakt frítíðargjald, svarandi til 1,5% av allari føstu árslønini og 12% av øllum útgoldnum viðbótum og úrtíðarløn í undanfarna innvinningarári.
Hesi gjøld verða at gjalda í seinasta lagi, tá ið frítíðin byrjar. Nevnda 1,5% frítíðargjald verður ikki goldið, tá ið farið verður úr starvi, men í staðin verður frítíðargjald 12% goldið av allari lønini undanfarna innvinningarár.

Stk. 3. Parttíðarstarvandi, sum arbeiða meira enn tað, sum avtalað er, og tað ikki verður roknað sum yvirtíðararbeiði, fáa fyri hetta arbeiði 12% í frítíðarløn. Tað er eisini galdandi, tá ið farið verður úr starvi.

Stk. 4. Sjúkradagar í frítíð verða vanliga viðroknaðir sum frítíðardagar. Tó kunnu eftir umsókn í serligum førum, har sjúkan forðar fyri nýtslu av frítíðini á rímiligan hátt, slíkir sjúkradagar koma undir reglurnar fyri sjúku, og nýggir frítíðardagar verða tá givnir. Um starvsfólkið er óarbeiðsført, tá ið frítíðin byrjar, verða tó altíð latnir eyka frídagar. Somu reglur verða galdandi í sambandi við sjúku undir frígongu.

§ 13 Barnferð
Starvskvinna, ið er við barn, eigur at siga stovninum frá í minsta lagi 3 mánaðir fyri metta føðing.

Stk. 2. Starvskvinna, ið er við barn, hevur rætt til barsilsfarloyvi av viðgongu og barnsburði. Tá ið 4 vikur eru eftir til metta føðing, kann starvskvinnan fara úr arbeiði við løn fram til føðing. Eftir føðing fær starvskvinnan farloyvi við løn í 24 vikur. Barsilsfarloyvið við løn kann soleiðis vera bæði styttri og longri enn 28 vikur tilsamans, men eftir føðing eru altíð 24 vikur við løn.

Stk. 3. Prógvar starvskvinnan við læknaváttan, at hon er óarbeiðsfør meir enn 4 vikur undan mettari føðing, verður hetta roknað sum vanlig sjúka, og starvskvinnan hevur tá rætt til løn undir sjúku. Tá ið 4 vikur eru eftir til metta føðing, verður farið frá løn undir sjúku til barsilsfarloyvi við løn, sbr. stk. 2.

Stk. 4. Umframt nevndu sømdir kann starvskvinna fáa farloyvi við løn alla viðgongutíðina, um hon við læknaváttan prógvar, at tað fyri fostur ella hana sjálva stendst heilsuvandi av at vera í starvinum.

Stk. 5. Frá 14. viku eftir føðing kunnu foreldrini býta rættin til barsilsfarloyvi við løn ímillum sín.

Stk. 6. Starvsfólk, ið ættleiða barn, hava rætt til fráveru við løn í upp til 4 vikur, áðrenn tey fáa barnið, og í 24 vikur tilsamans. Foreldrini kunnu býta rættin til fráveru við løn ímillum sín. Rætturin til fráveru við løn er treytaður av, at ættleiðingarmyndugleikin frammanundan hevur gjørt av, at foreldrini, annað ella bæði, skulu vera heima í samband við, at tey fáa barnið. Foreldrini kunnu ikki vera í farloyvi við løn samstundis eftir hesi grein.

Stk. 7. Umframt farloyvi nevnt í stk. 2-6, hava starvsfólk rætt til farloyvi við ongari løn og uttan at missa starvsaldur soleiðis, at samlaða farloyvistíðarskeiðið tilsamans er 52 vikur eftir føðing ella eftir, at tey hava fingið barnið. Tíðarskeiðini eru samanhangandi, og farloyvi eftir hesi grein skal vera avgreitt í seinasta lagi 52 vikur eftir føðing ella eftir, at tey hava fingið barnið.

§ 14 Eftirsitiløn
Doyr fysioterapeutur, sum er løntur eftir hesum sáttmála, eigur eftirsitandi hjúnafelagi/samlivari ella børn undir 18 ár, sum fysioterapeuturin hevur skyldu at uppihalda, rætt til løn í mun til uppsagnartíðina, tó í minsta lagi 3 mánaðir.

Stk. 2. Eftirsitiløn er tann løn, sum fysioterapeuturin hevði deyðsdagin. Lønin í mánaðinum, tá ið fysioterapeuturin doyr, verður ikki roknað upp í eftirsitilønina.

§ 15 Skeið
Um skeið til frama fyri arbeiðsstaðið fellur á leygardag, sunnudag ella fastan frídag, verður veitt frígonga fyri hesar dagar.

§ 16 Farloyvi
Fysioterapeutar kunnu fáa farloyvi uttan løn, um tað ikki nervar arbeiðsgongdina á stovninum.

Stk. 2. Farloyvi kann verða játtað í mesta lagi í 5 ár. Setanarmyndugleikarnir hava skyldu at hava starv leyst, tá ið farloyvistíðin er úti.

Stk. 3. Fær fysioterapeutur farloyvi í sambandi við útbúgving, ið tænir áhugamálum stovnsins, kann fysioterapeuturin fáa frí við løn ella við niðursettari løn við eftirlønargjaldi.

§ 17 Uppsøgn
Ætlar setanarmyndugleikin at siga fysioterapeut úr starvi, skal ætlanarskriv um uppsøgn verða latið felagnum og starvsfólkinum til ummælis við minst 14 daga freist. Eru í ætlanarskrivinum upplýsingar, sum eftir § 27 í fyrisitingarlógini eru mettir at vera eymir, fær felagið ikki ætlanarskrivið, men fráboðan um, at ætlanarskriv er latið starvsfólkinum.

Tímaløntir fysioterapeutar (§§ 18 - 21)

§ 18 Tímaløn
Fysioterapeutur, sum í meðal arbeiðir minni enn 15 tímar um vikuna, kann verða løntur við tímaløn.
Tímalønin verður roknað í dagtænastu sum 1/2080 og í kvøld- og náttartænastu sum 1/1924 partur av nettoárslønini eftir starvsaldri.

Stk. 2. Er ikki annað avrátt, hava tímalønt rætt til at verða avroknað eina ferð um mánaðin. Kann
lønin ikki útgjaldast í arbeiðstíðini, ella beint sum arbeiðstíðin byrjar ella endar, kann tann tímalønti
fáa lønina sendandi. Tilskilað skal vera, hvat ið lønin er fyri.

§ 19 Starvsaldur
Tá ið fysioterapeutur verður settur í tímalønt starv, verður starvsaldurin roknaður eftir somu reglum sum hjá mánaðarløntum fysioterapeutum. Kann fysioterapeutur prógva minst 705 tíma arbeiði í einum ári uttan at hava verið í føstum starvi, verður starvsaldur roknaður. Starvssetan minst 15 tímar um vikuna telur við sum fullur starvsaldur.

§ 20 Arbeiðstíð
Fyri tímaløntar fysioterapeutar er galdandi:
§ 9, stk. 1, 2, 7, 8 og 9.

Stk. 2. Er tímatal avrátt við fysioterapeut, og stovnurin ikki hevur nóg mikið av arbeiði til hetta starvsfólk, hevur tann tímalønti - um ikki stovnurin hevur boðað starvsfólkinum frá í seinasta lagi 4 tímar, áðrenn arbeiðið átti at byrja - rætt til løn fyri teir tímarnar, sum avrátt varð, at starvsfólkið skuldi arbeiða henda dagin.

§ 21 Uppsøgn, sjúka, frítíð o.a.
Tímalønt kunnu sigast upp við einari freist, sum verður roknað soleiðis: Fyri hvørjar fullar 14 arbeiðsdagar, arbeitt er, er uppsagnarfreistin 1 dagur.

Stk. 2. Tann tímalønti fysioterapeuturin kemur undir galdandi lóg um dagpening í sambandi við sjúku og barnsburð.

Stk. 3. Tímalønt fáa frítíð sambært løgtingslóg frá 1. apríl 1986 við seinni broytingum. Frítíðarlønin verður 12% av skattskyldugu inntøkuni almanakkaárið fyri.

§ 22 Ferðaútreiðslur
Ferðaútreiðslur í sambandi við avloysarastørv:

  • til avloysarastørv í 8 mánaðir og styttri rinda setanarmyndugleikarnir ferðaútreiðslurnar.

Ferðaútreiðslur í sambandi við dagliga arbeiðið og tænastuferðir:

  • fysioterapeutur, settur eftir hesum sáttmála, hevur rætt at fáa goldnar ferðaútreiðslur, dag- og tímapening og endurgjald fyri nýtslu av egnum akfari í tænastuørindum eftir reglunum hjá Fíggjarmálaráðnum, sambært avtalu millum Fíggjarmálaráðið og Felag Tænastumanna Landsins.

§ 23 Frálæra v.m.
Fysioterapeutar hava rætt til serliga løn fyri frálæru til næmingabólkar eftir hesum reglum:
1) Liggur fyrireiking og frálæra í arbeiðstíðini, fæst einki endurgjald.
2) Liggur frálæra í vanligari arbeiðstíð, og fyrireiking uttan fyri arbeiðstíð, verður endurgoldin hálv tímaløn fyri ta tíð, frálæran varir.
3) Liggur frálæra eftir arbeiðstíð, verður endurgoldið fyri teir tímar, frálæran varir.
4) Fyri hvørjar seks stílar ella uppgávur, sum verða rættaðir, verður goldin ein
frálærutími.

Stk. 2. Goldin verður tímaløn 215,28 kr. umframt 12% í frítíðarløn.

Stk. 3. Fyri frálæru til fysioterapeutar er tímalønin 418,27 kr. umframt 12% í frítíðarløn.

Stk. 4. Fyri frálæru til aðrar fakbólkar, verða goldnar 341,02 kr. um tíman umframt 12% í
frítíðarløn.

Stk. 5. Frálæra, ið verður givin um kvøldið, t.e. aftaná kl. 17.00, verður samsýnd eftir § 23, stk. 1-4, umframt eitt ískoyti uppá 20%.

Stk. 6. Tá ið fysioterapeutar halda fyrilestur er lønin 1.048,39 kr. fyri tann fyrsta tíman og 440,10 kr. fyri hvønn fylgjandi tíma.

Stk. 7. Fyri frálæru til bachelorlesandi, verður samsýnt eftir stk. 4.

§ 24 Álitisfólkaskipan
Á arbeiðsplássi, har ið minst 3 fysioterapeutar arbeiða, hava teir rætt at velja eitt álitisfólk og varaálitisfólk. Allar reglur - tó ikki uppsagnarfreistir - um álitisfólk eru somuleiðis galdandi fyri varaálitisfólk.

Stk. 2. Fysioterapeutar í leiðandi starvi kunnu ikki veljast til álitisfólk.

Stk. 3. Álitisfólkið hevur skyldu at ansa eftir, at lógir, sáttmálar, fyriskipanir o.a., sum eru galdandi fyri arbeiðsplássið/stovnin, sum heild verða hildin.

Stk. 4. Álitisfólkið hevur rætt og skyldu at tingast við deildar- og stovnsleiðsluna um øll mál, sum Fysioterapeutfelag Føroya og starvsfólk felagsins á arbeiðsplássinum/stovninum áleggja álitisfólkinum.

Stk. 5. Álitisfólkið skal - í samráð við stovnin - í arbeiðstíðini hava møguleika at taka sær av málum, sum viðvíkja starvsfeløgum ella arbeiðsviðurskiftum á stovninum/arbeiðsplássinum.

Stk. 6. Verður fysioterapeutur valdur í nevndina fyri Fysioterapeutfelag Føroya, hevur starvsfólkið rætt til frí við løn at gera felagsarbeiði í arbeiðstíðini, tó soleiðis at tað ikki darvar arbeiðsgongdini á staðnum. Tá ið álitisfólk/nevndarlimur er burtur frá arbeiði vegna álitismanna/felagsarbeiði og játtað er frí við løn, verður bara givið frí við løn fyri ta tíð, viðkomandi skuldi havt verið til arbeiðis.

Stk. 7. Verður álitisfólk/varaálitisfólk/nevndarlimur sagt upp, skulu Fysioterapeutfelag Føroya og Fíggjarmálaráðið viðgera málið. Við uppsøgnini skal fylgja nágreinilig grundgeving fyri at siga álitisfólkinum/varaálitisfólkinum/nevndarliminum upp. Henda grundgeving er grundarlagið fyri málsviðgerðini hjá Fysioterapeutfelag Føroya og Fíggjarmálaráðnum. Uppsagnarfreistin hjá álitisfólkum verður longd við 3 mánaðum. Reglurnar í álitisfólkaskipanini eru galdandi í tvey ár frá tí at viðkomandi er farin frá sum ávíkavist álitisfólk, varaálitisfólk ella nevndarlimur.

Stk. 8. Álitisfólkaval fer fram í september mánaði ómakaár, og felagið boðar avvarðandi
stovni/arbeiðsplássi frá, hvørji eru vald til álitisfólk.

Stk. 9. Álitisfólk og nevndarlimir í felagnum hava rætt til tænastufrí við løn at luttaka á
álitisfólkaskeiði.

§ 25 Samstarvsráð
Á øllum almennum stovnum verður sett á stovn eitt samstarvsráð, har umboð fyri leiðslu, álitisfólk og varaálitisfólk sita. Samstarvsráðið skal hava innlit í øll mál stovninum viðvíkjandi, og verða avgerðir ikki tiknar, fyrrenn samstarvsráðið hevur gjørt sítt tilmæli.

Stk. 2. Settur verður 4 manna bólkur við 2 umboðum valdum av yrkisfeløgunum og 2 valdum av landsstýrinum at gera uppskot til reglugerð fyri virkið hjá samstarvsráðnum.

§ 26 Gildi og uppsøgn
Hesin sáttmáli kemur í gildi 1. oktober 2020.

Stk. 2. Báðir partar hava rætt at siga sáttmálan upp at fara úr gildi við 3 mánaða ávaring, tó í fyrsta lagi til tann 1. januar 2023. Tá ið uppsøgnin av sáttmálanum fær gildi, og til nýggjur sáttmáli tekur við, verða fysioterapeutar fyribils løntir eftir teirri avtalu, sum var í gildi síðsta dag, ið sáttmálin galt.

Í Tinganesi tann 28 januar 2022

Fíggjarmálaráðið Fysioterapeutfelag Føroya

Jørgen Niclasen, landsstýrismaður/ Augusta Mikkelsen, forkvinna
Súsanna Nolsøe, fulltrúi