Fríggjadagin 3.mars var hátíðarløta á Landssjúkrahúsinum fyri Agnas Mortensen, ið kann hátíðarhalda sín 40 ára starvsdag sum fysioterapeutur á Landssjúkrahúsinum. Í hesum sambandi varð Agnas heiðrað við “fortjenestemedalju” í silvur frá Drotningini fyri góða og trúgva tænastu.

Álvur Hansen, leiðandi fysioterapeutur á Ergo- og fysioterapideildini, bjóðaði vælkomin. Í røðu síni takkaði hann Agnas fyri sítt megnar arbeiði sum fysioterapeutur á Landssjúkrahúsinum øll hesi árini. Agnas læs fysioterapi í Íslandi á sinni, og varð sum fyrsti føroyingur útbúgving fysioterapeutur á bachelorstigi. Umframt hollu vitan og royndir sínar hevur Agnas arbeitt á ymsum serøkjum og við støðugt at menna deildina. Agnas er ikki bert ein dugnaligur og ágrýtin fysioterapeutur, men eisini ein góður starvsfelagi.

Tummas í Garði, varastjóri, handaði Agnas riddarakrossin og takkaði henni fyri tað orku, hon hevur lagt í sítt arbeiði hesi seinastu 40 árini. Starvsfólkini á Ergo- og fysioterapideildini høvdu harumframt skipað fyri tveimum tónleikainnsløgum fyri Agnas. Børnini Andrea og Grímur, ið bæði starvast sum læknar á Landssjúkrahúsinum, spældu eitt klassiskt verk á flygil og violin fyri mammu síni, og at enda sang Dupultkvartettin í Ebenezer við Jens Andreassen, yvirlækna, á odda tvey løg.