Rørsla skapar góða heilsu - í dag og í framtíðini

Í dag seta fysioterapeutar kring heimin sjóneykuna á leiklutin hjá fysioterapi og rørslu í fyribyrging, viðgerð og endurvenjing av hjarta- og æðrasjúkum og heilatilburðum (heilabløðingum og blóðtøppum í heilanum).

Rørsla er ein týðandi partur av góðari heilsu.
Reglulig rørsla kann minka um váðan fyri eitt nú hjarta- og æðrasjúkum, høgum blóðtrýsti, diabetes og heilatilburðum – og hevur samstundis stóran týdning fyri okkara sálarligu heilsu, trivnað og lívsgóðsku.

1 av 4 fær ein heilatilburð einaferð í lívinum. Men nógv kann gerast fyri at fyribyrgja, og eftir ein heilatilburð hevur endurvenjing stóran týdning fyri at endurvinna rørslu, javnvág og førleikar – og fyri aftur at kunna liva eitt so virkið og sjálvbjargið lív sum gjørligt.

Fysioterapeutar hava ein týðandi leiklut.
Vit arbeiða við heilsu og rørslu gjøgnum alt lívið – frá rørslugleði og motoriskari menning hjá børnum til fyribyrging, viðgerð og endurvenjing hjá vaksnum og eldri.

Vit vilja hjálpa fólki at fyribyrgja sjúku og førleikamissi, handfara sjúku og pínu og endurvinna ella varðveita førleikar. Málið er ikki bara fleiri liviár, men eisini fleiri góð og virkin ár við so stórum sjálvbjargni sum gjørligt.

Samstundis standa vit sum samfelag við stórum heilsuavbjóðingum. Fleiri liva við varandi sjúku, og tørvurin á fyribyrging, endurvenjing og heilsufremjandi átøkum er stórur.

Tí er spurningurin ikki bara, um vit hava ráð til at raðfesta fysioterapi og fyribyrging. Spurningurin er, um vit hava ráð til at lata vera.

At seta inn tíðliga og geva fólki møguleika at varðveita sína heilsu og sínar førleikar er ein íløga – í heilsu, sjálvbjargni og lívsgóðsku hjá tí einstaka, men eisini í eitt samfelag, sum skal vera ført fyri at lofta framtíðar heilsuavbjóðingum.

Rørsla er ikki bara venjing. Rørsla er ein partur av heilsuni – gjøgnum alt lívið.

Fysioterapeutfelag Føroya